Croeso

Braint ac anrhydedd yw bod yn Bennaeth ar Ysgol Plasmawr.  Mae arwain yr ysgol i mewn i’w ail ddegawd yn her gyffrous yr ydym oll sy’n rhan o gymuned yr ysgol yn edrych ymlaen at ei hwynebu ac rwy’n argyhoeddedig y bydd yn gyfnod llwyddiannus a llewyrchus yn hanes yr Ysgol.

Mae yna dystiolaeth gadarn bod yr ysgol yn cynnig hinsawdd dysgu gadarnhaol a chefnogol sydd yn galluogi disgyblion i flasu amrywiaeth o brofiadau dysgu ac i lwyddo yn ei gwaith.  Mae’r broses hunan-arfarnu blynyddol yn cadarnhau bod i’r ysgol gryfderau aruthrol mewn sawl maes gyda’r hinsawdd disgybl-ganolog gryf sy’n treiddio trwy bob agwedd o fywyd ysgol yn sail i’r cyfan.

Gallwn ymfalchïo yn ein llwyddiannau chwaraeon ac yn ein perfformiadau drama a cherddorol a gallwn ymhyfrydu yn ein cyrhaeddiad academaidd ond yn fy marn i, y cwestiwn pwysica’ oll yw, a ydym fel ysgol yn cynnig yr ethos cywir sy’n caniatáu disgyblion o ba bynnag gefndir cymdeithasol-economaidd ac o ba bynnag ‘allu academaidd i gael eu cynnwys yn y llu o weithgareddau a phrofiadau dysgu ehangach a gynigir gan yr ysgol?
Rwy’n medru dweud gydag arddeliad a balchder mai ‘ydym’ yw’r ateb i’r cwestiwn hwnnw.

John Hayes

Pennaeth